《一起翻身的日子》之“歷史劇”

《一起翻身的日子》之“歷史劇” 林 喜 《一起翻身的日子》之“歷史劇” 上周末，澳門文化中心同香港戲劇界“神級”人物毛俊輝合作嘅“友導計劃”，揀選公演英國劇作家大衛·黑爾嘅《Fanshen》，由兩位嶄露頭角嘅本土靑年導演陳飛歷、譚智泉，再加上一班老、中、靑本土演員，有大師級人馬指導，再加上文化中心嘅資金、場地、技術支持，諸般元素集於一身，確係一次難得機會。 《FanShen》改編自美國人William Hinton嘅親歷中國土改運動回憶錄。今次演出改嘅中文名《一起翻身的日子》似乎太過文藝腔——此戲主要係講中國解放前嗰陣喺一個村莊入邊嘅“土地改革”，故事歷史感厚重，政治意涵亦強，喺澳門演出，無論導或演，都係唔易應付嘅挑戰。而從演出效果來睇，導演同演員都盡晒力，但最大問題都係演員嘅台詞技巧。演出雖用廣東話，但坐喺台下有時眞係聽得一舊舊。有此現象，可能一方面因呢齣戲雖然講嘅係中國故事，但寫戲嘅卻是鬼佬，有成陣“翻譯劇”味，再加上澳門人距離嗰段歷史實在太遠，對咩“土改”、“富農”之類嘅詞匯旣無概念亦缺共鳴，做起上來難免有隔膜。但從另一方面來睇，澳門平時少有同類主題嘅戲上演，今次呢個演出班底，睇落又眞係幾嚴謹，夠實淨，兩個導演嘅處理手法亦更趨成熟，對於澳門一直以來喺“歷史劇”範疇少有建樹嘅成績表，確令人眼前一亮。 林 喜 原文出自澳門日報 ： http://www.macaodaily.com/html/2012-05/03/content_695033.htm