《一起翻身的日子》之瑕瑜互見

《一起翻身的日子》之瑕瑜互見 林 樂 《一起翻身的日子》之瑕瑜互見 首先衷心一讚文化中心，夠膽識容許選演Fanshen呢啲似乎好敏感嘅題材，夠開明。 由於係毛俊輝掛頭牌，對《一起翻身的日子》自然有非一般嘅期望同要求。但當旁聽到一啲演員講話其實個戲有三個導演，咁林樂就有啲混淆，究竟毛Sir喺藝術創作嘅參與度有幾大，抑或只係“友導”？所以林樂唔知用邊把量尺嚟度個戲至可以對創作團隊公平。但相信以毛Sir嘅功力，點都會為導演同演員帶嚟演藝上嘅衝擊，至少喺排練嘅態度上面。 以現時創作團隊嘅一般背景嚟講，個戲嘅整體表現算係唔錯，但就冇乜驚喜，瑕瑜互見。演員水平十分參差，主要係來自唔同嘅歷練背景。有演員嘅台詞嚴重不清，唔知點解可以過到導演嗰關。林樂睇嗰晩，大部分演員都“食螺絲”，照計有咁長嘅排練時間，唔應該出呢啲問題。 個景設計好，有氣勢，做出空間深邃嘅感覺，但由於導演好少用到台右下區（台口），所以延伸出台口貼牆嘅設計就顯得多餘。燈光設計幾好，能夠照顧到氣氛，但喺燈區切割方面有啲唔夠“乾淨”。音樂係比較弱嘅一環，個戲用布萊希特嘅手法呈現，但配樂就反布萊希特，選用咗啲煽情音樂。為咗呈現布萊希特手法，循例咁安排演員在觀衆眼前“表演”暖身，此舉有啲造作，林樂相信演員早在觀衆入場前已經暖咗身。 同意林喜所講《一起翻身的日子》個譯名唔得乾脆利落，不但柔化咗個戲嘅image，仲容易誤導咗演員同觀衆嘅焦點，Fanshen要表現嘅係翻身過程中嘅人性，唔係翻身期間嗰的日子。 林 樂 原文出自澳門日報： http://www.macaodaily.com/html/2012-05/10/content_697059.htm